पडझडीचे सावट ; 'या' कारणामुळे होऊ शकते उद्या शेअर बाजारात घसरण.

 
पडझडीचे सावट ; 'या' कारणामुळे होऊ शकते उद्या शेअर बाजारात घसरण.
अमेरिकन अर्थव्यवस्था सावरू लागल्याने फेडरल रिझर्व्हकडून आर्थिक पॅकेजला कात्री लावण्याची शक्यता आहे. त्यामुळे जगभरातील भांडवली बाजारात पडझडीचे सावट निर्माण झाले आहे.
गेल्या दोन सत्रात तेजी-मंदी अनुभवणाऱ्या शेअर बाजारावर पडझडीचे सावट निर्माण झाले आहे. आज गुरुवारी मोहरमनिमित्त शेअर बाजार बंद होता. मात्र उद्या शुक्रवारी बाजारात घसरण होण्याची शक्यता विश्लेषकांनी व्यक्त केली आहे. त्यामुळे गुंतवणूकदारांनी सावधगिरी बाळगण्याचा सल्ला देण्यात आला आहे.

अमेरिकन केंद्रीय बँक असलेल्या फेडरल रिझर्व्हने आर्थिक पॅकेजच्या कपातीचे संकेत दिले आहेत. ज्यामुळे भारतसह उदयोन्मुख भांडवली बाजारात गुंतवणूकदार चौफेर विक्री करण्याची शक्यता आहे. अमेरिकन अर्थव्यवस्था बऱ्यापैकी सावरली आहे. त्यामुळे अर्थव्यवस्थेला प्रोत्साहन देण्यासाठी सुरु असलेल्या आर्थिक पॅकेजला कमी करण्याचे संकेत फेडरल रिझर्व्हने दिले आहे. या घडामोडीचे पडसाद बाजारावर उमटतील, असे मत शेअर बाजार विश्लेषक अंबरीश बलीगा यांनी व्यक्त केले. बाजार सध्या उच्चांकी पातळीवर आहे, त्यामुळे किरकोळ गुंतवणूकदारांनी सावधगिरी बाळगावी, असा सल्ला त्यांनी यावेळी दिला.
काल गुरुवारी सिंगापूर शेअर बाजारात २०० अंकांची घसरण झाली होती.फेडरल रिझर्व्हच्या बैठकीचे इतिवृत जाहीर झाले आहे. त्यात बहुतांश सदस्यांनी आर्थिक पॅकेजला कात्री लावणे आणि व्याज दरवाढ करण्याच्या बाजुने कौल दिला आहे. यानंतर बुधवारी अमेरिकन शेअर बाजारात घसरण झाली.

दरम्यान, मागील काही सत्रांमध्ये सेन्सेक्स आणि निफ्टीत प्रचंड वाढ झाली आहे. अनेक विश्लेषकांच्या मते बाजाराचे आताचे मूल्य हे वाजवीपेक्षा जास्त आहे. त्यामुळे निर्देशांक मूळपदाच्या दिशेने खाली येतील, असा अंदाज वर्तवण्यात आला आहे.

लॉकडाउन शिथिल झाल्यानंतर पूर्वपदावर येणारी अर्थव्यवस्था आणि करोना रुग्णसंख्येत घट झाल्याने गुंतवणूकदारांनी भांडवली बाजारात गुरुवारी जोरदार खरेदी केली होती. मुंबई शेअर बाजाराचा सेन्सेक्स प्रथमच ५६००० अंकांच्या पातळीवर गेला होता. मात्र शेवटच्या सत्रात त्यात नफावसुली झाली. काल गुरुवारी बाजार बंद होताना सेन्सेक्स १६२ अंकांनी घसरला आणि तो ५५६२९ अंकावर स्थिरावला होता. निफ्टी ४५ अंकांच्या घसरणीसह १६५६८ अंकावर बंद झाला होता